Sæmi svarar

Sjálfvirk spurningasvörun.

Spjallmennið Sæmi er snjöll viðbót við vefsíður sem sem innihalda fjölbreyttar upplýsingar. Hann skilur bæði talað mál og ritað og getur svarað spurningum notenda og veitt upplýsingar um efni vefsíðunnar. Sæmi er að störfum á vef Akraneskaupstaðar, akranes.is, þar sem hann svarar spurningum bæjarbúa allan sólarhringinn, óháð opnunartíma þjónustuvers. Fyrsta útgáfa Sæma var styrkt af Rannís, Markáætlun í tungu og tækni.

Símarómur

Talgervill fyrir íslensku á Android símum.

Símarómur er app fyrir Android-síma sem gerir notendum kleift að nota íslenskan talgervil sem skjálesara. Eins og er nýtir Símarómur talgervil gegnum vefþjónustu, en innan skamms mun verða hægt að hlaða íslenskum talgervli á símann sem þýðir að talgervingin mun ganga hraðar fyrir sig og engin gögn munu yfirgefa símann. Símarómur er samstarfsverkefni Grammateks, Tiro og Háskólans í Reykjavík og hann er þróaður innan ramma áætlunarinnar Máltækni fyrir íslensku 2019-2023 skv. samningi við Almannaróm.

Samræðukerfi

Opið þróunarumhverfi fyrir samræðukerfi á íslensku.

Þróunarumhverfi fyrir samræðukerfi á íslensku er nýtt samstarfsverkefni Grammateks, Tiro og Háskólans í Reykjavík. Verkefnið er til tveggja ára og miðar að því að gefa út opið þróunarumhverfi sem getur orðið grunnur að sérhæfðum samræðukerfum sem skilja og tala íslensku.

Verkefnið er styrkt af Rannís, Markáætlun í tungu og tækni.

Textavinnsla fyrir taltækni

Textanormun og hljóðritun.

Til þess að talgervill geti lesið texta eins og þeir birtast okkur t.d. á vefnum, þarf að umbreyta þeim á það form sem lýsir því hvernig á að bera þá fram. Það þarf að skrifa út allar tölur, tákn og skammstafanir og keyra svo textann gegnum hljóðritunarkerfi, sem styðst bæði við íslenska framburðarorðabók og kerfi sem hljóðritar ný eða óþekkt orð sjálfvirkt.

Grammatek getur aðstoðað við að greina fagtexta og aðra sérhæfða texta til þess að aðlaga almennt textavinnslukerfi að nýjum sviðum.

Máltækni fyrir íslensku

SÍM, Samstarf um íslenska máltækni.

Grammatek er þátttakandi í SÍM, Samstarfi um íslenska máltækni, sem hefur unnið að framkvæmd áætlunarinnar Máltækni fyrir íslensku 2019-2023. Anna Björk er einn höfunda skýrslunnar, sem liggur áætluninni til grundvallar og auk þess sá Grammatek um heildar verkefnisstjórn fyrstu tvö ár verkefnisins. Grammatek sinnir rannsóknum og þróun fyrir verkefnið, fyrst og fremst á sviðum textavinnslu fyrir taltækni og appþróun.

SÍM

Máltækniáætlun

Fundir og fyrirlestrar

Viltu vita meira um máltækni?

Við hjá Grammateki erum reyndir fyrirlesarar sem getum haldið kynningar á íslensku, ensku og þýsku. Við erum líka alltaf til í spjall um máltækni yfir kaffi, te eða bjór.